శ్రీదేవి, భూదేవి సమేత కల్యాణ వెంకటేశ్వర స్వామి రూపం పరిపూర్ణ వైవాహిక బంధానికి, సృష్టి సమతుల్యతకు మరియు భక్తుల కోర్కెలను తీర్చే అపారమైన కరుణకు ప్రతీక. కలియుగ వైకుంఠనాథుడైన వేంకటేశ్వర స్వామి తన ఇద్దరు దేవేరులతో కలిసి దర్శనమిచ్చే ఈ రూపం వెనుక ఒక పవిత్రమైన వివాహ చరిత్ర మరియు లోతైన ఆధ్యాత్మిక రహస్యం ఉన్నాయి. స్వామివారికి ఇరువైపులా ఉండే శ్రీదేవి, భూదేవిలు కేవలం భార్యలు మాత్రమే కాదు, వారు భగవంతుని యొక్క రెండు ప్రధాన శక్తులు: శ్రీదేవి (మహాలక్ష్మి) "ఇచ్ఛాశక్తి", భూదేవి "క్రియాశక్తి".

ద్వాపర యుగం ముగిసి కలియుగం ప్రారంభమయ్యే సమయంలో, భృగు మహర్షి వల్ల క్షీరసాగరాన్ని వదిలి భూలోకానికి వచ్చిన లక్ష్మీదేవిని వెతుకుతూ మహావిష్ణువు శ్రీనివాసుడిగా శేషాచలం కొండల్లో వెలిశాడు. ఆకాశరాజు కుమార్తెగా 'పద్మావతి' జన్మించింది. శ్రీనివాసుడు ఆమెను చూసి మోహించి, నారద మహర్షి మరియు వకుళాదేవిల సహాయంతో ఆకాశరాజుకు వివాహ ప్రస్తావన పంపాడు. కుబేరుని వద్ద అప్పు తీసుకుని, నారాయణవనంలో పద్మావతి దేవిని శ్రీనివాసుడు అత్యంత వైభవంగా వివాహం చేసుకున్నాడు. ఈ పద్మావతి దేవే శ్రీదేవి స్వరూపం. వరాహ పురాణం ప్రకారం, భూదేవిని హిరణ్యాక్షుని నుండి రక్షించిన వరాహస్వామి ఆమెను వివాహం చేసుకున్నాడు. కలియుగంలో వేంకటేశ్వరుడు తిరుమలలో అడుగుపెట్టినప్పుడు, అది వరాహస్వామి స్థలం కావడం చేత, భూదేవి సమేత వరాహస్వామి అనుమతితోనే అక్కడ స్థిరపడ్డాడు. ఆ విధంగా భూదేవి కూడా స్వామివారి అర్ధాంగిగా నిలిచింది. వివాహం ముగిసిన తర్వాత శ్రీనివాసుడు పద్మావతి దేవిలో కలిసి తిరుమల కొండ పైకి వెళ్ళడానికి ముందు, అగస్త్య మహర్షి ఆశ్రమం ఉన్న శ్రీనివాస మంగాపురం లో కొన్ని నెలల పాటు గడిపాడు. ఇక్కడే స్వామివారు శ్రీదేవి, భూదేవి సమేతంగా "కల్యాణ వెంకటేశ్వరుడు" గా వెలిశారు. స్వయంభూగా వెలసిన ఆలయ నమూనాలు మరియు మూలవిరార్ నమూనాలను అనుసరిస్తూ "ఓం శివశక్తి పీఠం శంబాల నగరం" నందు శాస్త్రోక్తంగా మంత్ర యంత్ర తంత్రాలను అనుసరించి లోకకల్యాణం కొరకు ప్రతిష్టించబడింది. కావున భక్తులు అందరూ దర్శించండి తరించండి.

శ్లోకం : -

శ్రీదేవీ భూదేవీ సమేత శ్రీ కల్యాణ వేంకటేశ్వరస్వామినే నమః |

కల్యాణాద్భుత గాత్రాయ కామితార్థ ప్రదాయినే |

శ్రీమద్వేంకట నాథాయ శ్రీనివాసాయ తే నమః ||

భావం : -

మంగళకరమైన, అద్భుతమైన దివ్య శరీరం కలిగినవాడు, భక్తులు కోరిన కోర్కెలను తక్షణమే ప్రసాదించేవాడు, మరియు శ్రీదేవి, భూదేవిలతో కూడి లక్ష్మీ నివాసుడైన ఆ శ్రీ వేంకటేశ్వర స్వామికి నేను మనస్ఫూర్తిగా నమస్కరిస్తున్నాను.

పూజా ఫలితం : -

వివాహం ఆలస్యమవుతున్న యువతీ యువకులు లేదా జాతకంలో వివాహ దోషాలు ఉన్నవారు ఈ స్వామికి కల్యాణోత్సవం జరిపించినా, లేదా ఈ రూపాన్ని పూజించినా అడ్డంకులన్నీ తొలగిపోయి శీఘ్రంగా మంచి సంబంధం కుదురుతుంది. భార్యాభర్తల మధ్య మనస్పర్థలు, గొడవలు ఉన్నవారు ఈ స్వామిని ఆరాధిస్తే కుటుంబంలో శాంతి, అన్యోన్యత పెరుగుతాయి. శ్రీదేవి (లక్ష్మి), భూదేవి (భూసంపద) ఇద్దరూ స్వామివారితో కలిసి ఉన్నారు కాబట్టి, ఈ పూజ వల్ల గృహంలో ధనధాన్యాలకు, ఆస్తులకు ఎటువంటి లోటూ ఉండదు.