శ్రీ పంచముఖ ఆంజనేయస్వామి రూపం హనుమంతుని అవతారాలలో అత్యంత శక్తివంతమైన, దివ్యమైన మరియు రక్షణాత్మకమైన రూపం. ఐదు ముఖాలు, పది చేతులతో నలుదిక్కులా ఆయుధాలను ధరించి దర్శనమిచ్చే ఈ రూపం వెనుక ఒక అద్భుతమైన చాతుర్య, పరాక్రమ కథ ఉంది.

రామరావణ యుద్ధ సమయంలో, రావణాసురుని సోదరుడైన 'మహిరావణుడు' అనే పాతాళ లంకాధిపతి తన మాయా శక్తులతో రామలక్ష్మణులను అపహరించి, పాతాళ లోకానికి తీసుకువెళతాడు. వారిని రక్షించడం కోసం హనుమంతుడు పాతాళ లంకకు చేరుకుంటాడు. మహిరావణుడి ప్రాణాలు ఒకే సమయంలో వేర్వేరు దిక్కులలో వెలుగుతున్న ఐదు దివ్వెలులో దాగి ఉన్నాయని హనుమంతుడు తెలుసుకుంటాడు. మహిరావణుడిని వధించాలంటే, ఆ ఐదు దీపాలను ఒకే సమయంలో ఊది ఆర్పివేయాలి. ఆ పని చేయడం కోసం హనుమంతుడు ఐదు విభిన్న దిక్కుల వైపు చూసే ఐదు ముఖాలను ధరించాడు. అలా ఒకేసారి ఐదు దీపాలను ఆర్పి, మహిరావణుడిని సంహరించి రామలక్ష్మణులను క్షేమంగా తిరిగి తీసుకువచ్చాడు. ఈ ఘట్టంలోనే పంచముఖ హనుమదావతారం సంభవించింది. స్వయంభూగా వెలసిన ఆలయ నమూనాలు మరియు మూలవిరార్ నమూనాలను అనుసరిస్తూ "ఓం శివశక్తి పీఠం శంబాల నగరం" నందు శాస్త్రోక్తంగా మంత్ర యంత్ర తంత్రాలను అనుసరించి లోకకల్యాణం కొరకు ప్రతిష్టించబడింది. కావున భక్తులు అందరూ దర్శించండి తరించండి.

శ్లోకం : -

పంచవక్త్రం మహాభీమం త్రిణేత్రం చ హిరణ్మయమ్ |

బాహుభిర్దశభిర్యుక్తం సర్వాభరణభూషితమ్ ||

భావం : -

ఐదు ముఖములతో అత్యంత పరాక్రమవంతంగా ప్రకాశించేవాడు, మూడు కన్నులు కలిగినవాడు, బంగారు వన్నెతో మెరిసిపోయేవాడు, పది చేతులలో వివిధ ఆయుధాలను ధరించి, సమస్త ఆభరణములతో అలంకరించబడిన ఆ శ్రీ పంచముఖ ఆంజనేయస్వామికి నేను నమస్కరిస్తున్నాను.

పూజా ఫలితం : -

ఇంట్లో పంచముఖ ఆంజనేయస్వామి పటాన్ని ఉంచి పూజించడం వల్ల నరఘోష, చేతబడి, నకారాత్మక శక్తులు (నెగటివ్ ఎనర్జీ) దరిచేరవు. ముఖ్యంగా శని మహాదశ, ఏల్నాటి శని, లేదా రాహు-కేతువుల పీడలతో ఇబ్బంది పడేవారికి ఈ స్వామి ఆరాధన ఒక అద్భుతమైన రక్షణ కవచంలా పనిచేస్తుంది. నిలిచిపోయిన పనులు వేగంగా పూర్తవుతాయి. మానసిక ఆందోళనలు తొలగి ఆత్మవిశ్వాసం పెరుగుతుంది.