వల్లీ దేవసేన సమేత సుబ్రహ్మణ్య స్వామి :

వల్లీ దేవసేన సమేత షణ్ముఖ స్వామి రూపం జ్ఞానానికి, శౌర్యానికి మరియు పరిపూర్ణ గృహస్థ జీవితానికి ప్రతీక. హిందూ పురాణాలలో శ్రీ సుబ్రహ్మణ్య స్వామి దేవసేనాధిపతిగా, జ్ఞాన స్వరూపుడిగా మరియు శివపార్వతుల పుత్రుడిగా అత్యంత భక్తిశ్రద్ధలతో కొలువబడే దైవం.

తారకాసురుడు, సురపద్ముడు, సింహముఖుడు అనే రాక్షసులు బ్రహ్మదేవుని నుండి అజేయమైన వరాలు పొంది లోకాలను పీడిస్తుంటారు. శివుని తేజస్సు నుండి పుట్టిన వానికి మాత్రమే తమను సంహరించే శక్తి ఉంటుందని వరం పొందుతారు. ఆ సమయంలో సతీదేవి వియోగంలో ఉన్న శివుడిని ధ్యానం నుండి బయటకు తీసుకురావడానికి మన్మథుడు ప్రయత్నించి భస్మమవుతాడు.

శివపార్వతుల అఖండ తేజస్సు (అగ్ని స్వరూపం) నుండి వెలువడిన దివ్య బీజాన్ని అగ్నిదేవుడు భరించలేక గంగానదిలో విడుస్తాడు. గంగాదేవి దానిని శరవణ భవ (దర్భ వనం) లోని ఒక సరస్సులో ఉంచుతుంది. అక్కడ ఆ తేజస్సు ఆరుగురు శిశువులుగా మారుతుంది. 'కృత్తిక' అనే ఆరుగురు నక్షత్ర దేవతలు ఆ పిల్లలకు పాలు ఇచ్చి పెంచుతారు. ఆ తర్వాత పార్వతీ దేవి ఆ ఆరుగురు పిల్లలను దగ్గరకు తీసుకోగా, వారంతా కలిసి షణ్ముఖుడిగా (ఆరు ముఖాల స్వామిగా) ఒకే రూపంగా మారతారు. స్వామి వారు ఇరువురు భార్యలు 'క్రియా శక్తి' 'ఇచ్ఛా శక్తికి' ప్రతిరూపాలు. స్వామివారు స్వయంగా 'జ్ఞాన శక్తి'. ఈ మూడు శక్తుల కలయికే విశ్వ గమనం. స్వయంభూగా వెలసిన ఆలయ నమూనాలు మరియు మూలవిరార్ నమూనాలను అనుసరిస్తూ "ఓం శివశక్తి పీఠం శంబాల నగరం" నందు శాస్త్రోక్తంగా మంత్ర యంత్ర తంత్రాలను అనుసరించి లోకకల్యాణం కొరకు ప్రతిష్టించబడింది. కావున భక్తులు అందరూ దర్శించండి తరించండి..

శ్లోకం :-

వల్లీదేవసేనా సమేత శ్రీ సుబ్రహ్మణ్యాయ నమః | మయూర వాహనం వీరం తారకాసుర

మర్దనమ్ |వందే షణ్ముఖనాథం తం వల్లీకాంతం జగద్గురుమ్ ||

భావం :-

నెమలిని వాహనంగా చేసుకున్నవాడు, పరాక్రమవంతుడు, తారకాసురుడనే రాక్షసుడిని అంతమొందించినవాడు, ఆరు ముఖములు కలవాడు, వల్లీదేవి ప్రాణనాథుడు మరియు జగత్తుకే గురువైన ఆ వల్లి, దేవసేన సమేత శ్రీ సుబ్రహ్మణ్య స్వామికి నేను నమస్కరిస్తున్నాను.

పూజా ఫలితం :-

వల్లి దేవసేన సమేత సుబ్రహ్మణ్య స్వామిని పూజించడం వల్ల వివాహంలో వచ్చే అడ్డంకులు, కుజ దోషాలు తొలగిపోయి శీఘ్రంగా వివాహం జరుగుతుంది. 'సంతాన సుబ్రహ్మణ్యుడిగా' ఈ రూపాన్ని ఆరాధించడం వల్ల సంతాన లేమి సమస్యలు తొలగుతాయి. భార్యాభర్తల మధ్య గొడవలు తగ్గి, కుటుంబంలో శాంతి, సమాధానం లభిస్తాయి. స్వామివారి శక్తి ఆయుధం వల్ల భయాలు తొలగి, కోర్టు సమస్యలు, శత్రు పీడల నుండి విముక్తి కలుగుతుంది.