శ్రీ మహాలక్ష్మి అమ్మవారి ఆలయం (మహారాష్ట్రలోని కొల్హాపూర్) ఆదిశంకరాచార్యులు పేర్కొన్న అష్టాదశ (18) శక్తిపీఠాలలో ఏడవ శక్తిపీఠం . పంచగంగా నదీ తీరాన కొలువై ఉన్న ఈ క్షేత్రాన్ని 'కరావీర క్షేత్రం' అని కూడా పిలుస్తారు. తిరుమల వేంకటేశ్వర స్వామిని దర్శించుకున్న భక్తులు కొల్హాపూర్ మహాలక్ష్మిని దర్శించుకుంటేనే వారి యాత్ర పరిపూర్ణమవుతుందని నమ్ముతారు.

దక్షయజ్ఞం తర్వాత సతీదేవి పవిత్ర శరీరాన్ని విష్ణుమూర్తి తన సుదర్శన చక్రంతో ఖండించినప్పుడు, అమ్మవారి "కంటి చూపు" (లేదా త్రిశూలం యొక్క పై భాగం) పడిన పవిత్ర స్థలమిది. పురాణాల ప్రకారం, ఒకసారి భృగు మహర్షి మహావిష్ణువు వక్షఃస్థలంపై తన్నాడు. తన నివాస స్థానాన్ని అవమానించినందుకు కోపించిన లక్ష్మీదేవి, వైకుంఠాన్ని వదిలి భూలోకంలోని ఈ కొల్హాపూర్ (కరావీరపురం) ప్రాంతానికి వచ్చి తపస్సులో నిమగ్నమైంది. ఆ తర్వాత కొల్హాసురుడనే రాక్షసుడిని సంహరించి భక్తుల కోరిక మేరకు ఇక్కడే స్థిరపడింది. ఆధ్యాత్మికంగా ఈ క్షేత్రానికి ఎంత ప్రాధాన్యత ఉందంటే, ప్రళయ కాలంలో కూడా ఈ నగరానికి నాశనం ఉండదు. ఎందుకంటే లక్ష్మీదేవి తన కుడి చేతితో ఈ నగరానికి రక్షణ కవచాన్ని ఇస్తుందని పురాణాలు చెబుతున్నాయి. స్వయంభూగా వెలసిన ఆలయ నమూనాలు మరియు మూలవిరార్ నమూనాలను అనుసరిస్తూ "ఓం శివశక్తి పీఠం శంబాల నగరం" నందు శాస్త్రోక్తంగా మంత్ర యంత్ర తంత్రాలను అనుసరించి లోకకల్యాణం కొరకు ప్రతిష్టించబడింది. కావున భక్తులు అందరూ దర్శించండి తరించండి..

శ్లోకం : -

"అలంపురే జోగులాంబా, శ్రీశైలే మల్లికార్జునీ |

కోల్హాపురే మహాలక్ష్మీ, మాహుర్యే ఏకవీరికా ||"

భావం : -

కొల్హాపూర్ మహాక్షేత్రంలో 'శ్రీ మహాలక్ష్మి దేవి' గా వెలిసిన ఆ జగన్మాతకు నా నమస్కారములు.

పూజా ఫలితం : -

సాక్షాత్తు లక్ష్మీదేవి అలకతో వచ్చి కొలువై ఉన్న స్థానం కాబట్టి, ఈమెను దర్శించడం వల్ల ఎంతటి ఘోరమైన దరిద్ర బాధలైనా, ఆర్థిక ఇబ్బందులైనా తొలగిపోయి అష్టైశ్వర్యాలు కలుగుతాయి. తిరుమల శ్రీవారికి, కొల్హాపూర్ అమ్మవారికి అవినాభావ సంబంధం ఉంది. ఇక్కడి అమ్మవారిని పూజిస్తే వేంకటేశ్వర స్వామి సంపూర్ణ అనుగ్రహం లభిస్తుంది. మానసిక ప్రశాంతత, వ్యాపార వృద్ధి, మరియు కుటుంబంలో సుఖసంతోషాలు సిద్ధిస్తాయి.