రాధాకృష్ణులు :-

శ్రీ రాధాకృష్ణుల బంధం లౌకికమైనది కాదు, అది జీవాత్మ పరమాత్మల పరమ పవిత్రమైన అనుబంధం. హిందూ సంప్రదాయంలో రాధాకృష్ణులు కేవలం ప్రేమికులు మాత్రమే కారు, వారు 'హ్లాదినీ శక్తి' (ఆనందాన్నిచ్చే శక్తి) మరియు 'శక్తిమంతుడు' కలయిక.

సృష్టికి పూర్వమే పరమాత్మ అయిన శ్రీకృష్ణుడు ఊర్ధ్వ లోకమైన 'గోలోకం'లో కొలువై ఉన్నాడు. ఆయన తన లీలల కొరకు తన అంతరంగ శక్తి (మహాలక్ష్మి స్వరూపం) నుండి ఒక సుందరమైన రూపానికి జన్మనిచ్చారు. ఆ రూపమే రాధారాణి. వారు గోలోకంలో నిరంతరం ప్రేమ లీలా వినోదాలలో ఉండేవారు. ఒక శాపం కారణంగా రాధాకృష్ణులు ద్వాపర యుగంలో భూలోకంలో జన్మించవలసి వచ్చింది. మహావిష్ణువు దేవకీ వసుదేవుల పుత్రుడిగా మథురలో జన్మించి, నందుని ఇంట బృందావనంలో పెరిగాడు. బృందావనానికి సమీపంలోని బరసానా (రావల్ గ్రామం) లో వృషభానుడు, కీర్తిద అనే దంపతులకు రాధాదేవి యమునా నదిలో ఒక తామరపువ్వుపై చిన్న శిశువుగా లభించింది. ఆమె జన్మతః కళ్లు తెరవలేదు. ఎప్పుడైతే బాలకృష్ణుడు ఆమెను చూడటానికి వచ్చాడో, ఆ కృష్ణుడి ముఖాన్ని చూడటానికే రాధ మొట్టమొదటిసారిగా కళ్లు తెరిచింది. రాధాకృష్ణుల చరిత్ర భౌతికమైన వివాహ బంధానికి అతీతమైనది. రాధ కంటే కృష్ణుడు వయసులో చిన్నవాడు. వారి మధ్య ఉన్నది 'మధుర భక్తి'. కృష్ణుడి మురళీ గానానికి రాధ తన్మయత్వం చెందేది. ఒకసారి రాధాకృష్ణుల వివాహం గురించి ఉద్ధవుడు అడుగగా, కృష్ణుడు నవ్వి... "వివాహానికి ఇద్దరు వ్యక్తులు కావాలి, కానీ రాధా నేను వేరు వేరు కాదు, ఒక్కటే. ఒకే ఆత్మ అయినప్పుడు ఒకరిని ఒకరు ఎలా వివాహం చేసుకోగలరు?" అని చెప్తాడు.స్వయంభూగా వెలసిన ఆలయ నమూనాలు మరియు మూలవిరార్ నమూనాలను అనుసరిస్తూ "ఓం శివశక్తి పీఠం - శంబాల నగరం" నందు శాస్త్రోక్తంగా మంత్ర యంత్ర తంత్రాలను అనుసరించి లోకకల్యాణం కొరకు ప్రతిష్టించబడింది. కావున భక్తులు అందరూ దర్శించండి తరించండి.

శ్లోకం :-

"తప్తకాంచన గౌరాంగి రాధే బృందావనేశ్వరి ।

వృషభాను సుతే దేవి ప్రణమామి హరిప్రియే ॥"

భావం :-

"కరిగించిన బంగారం వంటి మెరిసే శరీర ఛాయ కలిగినదానా! బృందావనానికి మహారాణివైన ఓ రాధాదేవి! వృషభాను మహారాజు పుత్రికా, శ్రీహరికి అత్యంత ప్రియమైనదానా, అమ్మా నీకు నా భక్తిపూర్వక ప్రణామాలు."

పూజా ఫలితం :-

అన్యోన్య దాంపత్యం & ప్రేమ లభ్యత, మానసిక ప్రశాంతత & ఆనందం, పాప విముక్తి & మోక్ష ప్రాప్తి, సంతాన ప్రాప్తి.