Back

శ్రీ ఇంద్రాణి దేవి

శ్రీ సప్తమాతృకలలో ఆరవ వారైన శ్రీ ఇంద్రాణి దేవి (ఐంద్రి అని కూడా పిలుస్తారు) ఆవిర్భావం దుర్గ సప్తశతి ప్రకారం, శుంభ-నిశుంభులు మరియు రక్తబీజుడు అనే రాక్షసులతో జరిగిన భీకర యుద్ధంలో జగన్మాతకు తోడుగా నిలిచేందుకు దేవతల శక్తులన్నీ ఏకమయ్యాయి. ఆ సమయంలో దేవతల రాజు, స్వర్గాధిపతి అయిన ఇంద్రుని తేజస్సు, శక్తి మరియు రూపం నుండి ఈమె ఆవిర్భవించింది. ఇంద్రుని శక్తి స్వరూపమే ఈ "ఇంద్రాణి దేవి". స్వయంభూగా వెలసిన ఆలయ నమూనాలు మరియు మూలవిరార్ నమూనాలను అనుసరిస్తూ "ఓం శివశక్తి పీఠం శంబాల నగరం" నందు శాస్త్రోక్తంగా మంత్ర యంత్ర తంత్రాలను అనుసరించి లోకకల్యాణం కొరకు ప్రతిష్టించబడింది. కావున భక్తులు అందరూ దర్శించండి తరించండి..

శ్లోకం :-

కిరీటినీ మహావజ్రే సహస్రనయనోజ్జ్వలే |

ఐంద్రీస్వరూపేణ నారాయణి నమోస్తుతే ||

భావం :-

మకుటమును (కిరీటాన్ని) ధరించి, మహా శక్తివంతమైన వజ్రాయుధాన్ని చేతబూని, వేయి కన్నుల కాంతితో ప్రకాశిస్తూ, ఇంద్రాణి రూపంలో ఉన్న ఓ నారాయణీ దేవి! నీకు వందనములు. ఐరావతమనే శ్వేత గజాన్ని (తెల్ల ఏనుగును) అధిరోహించి, చేతిలో వజ్రాయుధాన్ని పట్టుకుని, భక్తులకు వరాలను అనుగ్రహించే వేయి కన్నుల ఐంద్రీ దేవి, నిన్ను నా హృదయంలోకి ఆవాహన చేసుకుంటున్నాను.

పూజా ఫలితం :-

సమాజంలో ఉన్నతమైన పదవులు, రాజకీయంగా లేదా ఉద్యోగపరంగా అధికారాలు లభిస్తాయి. పేరు ప్రఖ్యాతులు వృద్ధి చెందుతాయి. దరిద్రం తొలగిపోయి, జీవితంలో ఎలాంటి లోటు లేని భోగభాగ్యాలు, విలాసవంతమైన జీవితం సిద్ధిస్తుంది. ముఖ్యంగా స్త్రీలకు సౌభాగ్యం (ఐదవతనం) లభిస్తుంది. వివాహ బంధాలు బలపడతాయి. శత్రువుల నుండి వచ్చే ఆపదలు తొలగిపోతాయి. వజ్రాయుధ రక్షణ వలె అమ్మవారి అనుగ్రహం భక్తులను కాపాడుతుంది.