Back

శ్రీ బ్రాహ్మణి దేవి

శ్రీ సప్తమాతృకలలో మొదటి వారైన శ్రీ బ్రాహ్మణి దేవి ఆవిర్భావం దుర్గ సప్తశతి (దేవీ మహాత్మ్యం) ప్రకారం, శుంభ-నిశుంభులు మరియు రక్తబీజుడు అనే రాక్షసులను సంహరించడానికి మహాశక్తి (దుర్గాదేవి) యుద్ధరంగంలో నిలిచింది. ఆ సమయంలో రాక్షస మూకలను అంతమొందించడానికి బ్రహ్మ, విష్ణు, మహేశ్వర, ఇంద్ర, కుమార, వరాహ, నరసింహ వంటి దేవతల శక్తులు వారి రూపాలతో, ఆయుధాలతో దేవికి సహాయంగా ఆమె శరీరం నుండి ఆవిర్భవించాయి. అందులో బ్రహ్మ దేవుని శక్తిగా, ఆయన రూపంతో ఆవిర్భవించిన చైతన్య స్వరూపిణీయే "బ్రాహ్మణి దేవి". స్వయంభూగా వెలసిన ఆలయ నమూనాలు మరియు మూలవిరార్ నమూనాలను అనుసరిస్తూ "ఓం శివశక్తి పీఠం శంబాల నగరం" నందు శాస్త్రోక్తంగా మంత్ర యంత్ర తంత్రాలను అనుసరించి లోకకల్యాణం కొరకు ప్రతిష్టించబడింది. కావున భక్తులు అందరూ దర్శించండి తరించండి..

శ్లోకం :-

హంసయుక్త విమానస్థే బ్రహ్మాణీరూపధారిణీ |

కౌశాంభఃక్షరికే దేవి నారాయణి నమోస్తుతే ||

భావం :-

హంసలు కాడికి కట్టిన విమానాన్ని (రథాన్ని) అధిరోహించి, బ్రహ్మదేవుని రూపమును ధరించి, పవిత్రమైన కమండల జలమును ప్రోక్షించే ఓ బ్రాహ్మణి దేవి (నారాయణి స్వరూపిణి)! నీకు నా శతకోటి నమస్కారములు. జపమాల, కమండలం, సృక్-స్రువములు (యజ్ఞ పాత్రలు) ధరించిన చతుర్ముఖి అయిన ఓ తల్లీ, నిన్ను నా హృదయంలోకి ఆవాహన చేస్తున్నాను.

పూజా ఫలితం :-

బుద్ధి మాంద్యత తొలగి, జ్ఞాపకశక్తి, ఏకాగ్రత పెరుగుతాయి. విద్యార్థులకు అత్యంత మేలు జరుగుతుంది. కళలు, సాహిత్యం, శాస్త్ర రంగాలలో ఉన్నవారికి సృజనాత్మకత పెరుగుతుంది. ఆధ్యాత్మిక సాధకులకు అహంకారం తొలగి, ఆత్మజ్ఞానం మరియు మానసిక ప్రశాంతత లభిస్తాయి. మాట్లాడే తీరులో స్పష్టత, సరస్వతీ కటాక్షం లభిస్తుంది.